ભીતરનો ભેરૂ મારો, આતમો ખોવાણો રે
મારગનો ચીંધનારો ભોમિયો ખોવાણો રે
હે…વાટે વિસામો લેતો જોયો હોય તો કહેજો…ભીતરનો ભેરૂ
એના રે વિના મારી કાયા છે પાંગળી ને,
નજર્યું છતાંયે મારી આંખું છે આંધળી,
મારા રે સરવરિયાનો હંસલો ખોવાણો રે
હે…સરવરમાં તરતો કોઇએ જોયો હોય તો કહેજો…ભીતરનો ભેરૂ
તનડું રૂંધાયું મારું, મનડું રૂંધાયું ને,
તારા તૂટ્યાને અધવચ ભજન નંદવાયું રે,
કપરી આંધીમાં મારે દીવડો ઝડપાયો રે,
હે….આછો સળગતો કોઇએ જોયો હોય તો કહેજો…ભીતરનો ભેરૂ
